ក្រសួងកំពុងជំរុញ កម្មវិធីសិក្សាពីចម្ងាយ ឬ E-Learning ឲ្យកាន់តែច្រើន
(ITC-Phnom Penh): A good article from the Phnom Penh Post Newspaper about 2016 e-Learning forum, which is held on November 30, 2016 at Institute of Technology of Cambodia: "ក្រសួងកំពុងជំរុញ កម្មវិធីសិក្សាពីចម្ងាយ ឬ E-Learning ឲ្យកាន់តែច្រើន".
For full article, please visit the link below:
Phnom Penh Post Newspaper: https://goo.gl/iAhMKB
Lareine News : http://www.lareine.news/detail-25fca7b972285dc9.html
Quoted from Phnom Penh Post
ក្រសួងកំពុងជំរុញ កម្មវិធីសិក្សាពីចម្ងាយ ឬ E-Learning ឲ្យកាន់តែច្រើន
ភ្នំពេញៈ កម្មវិធីសិក្សាបែបទំនើបពីចម្ងាយ ឬ e-Learning កំពុងត្រូវបានលើកកម្ពស់ និងជំរុញកាន់តែទូលាយឲ្យបណ្ដាសាកលវិទ្យាល័យនានានៅកម្ពុជា ខណៈក្រសួងអប់រំបានចាប់ផ្តើមកម្មវិធីសិក្សាថ្មីនេះ ដំបូងនៅវិទ្យាស្ថានបច្ចេកវិទ្យាកម្ពុជា(ITC) កាលពីឆ្នាំ ២០១១។
លោក យក់ ង៉ុយ រដ្ឋលេខាធិការក្រសួងអប់រំយុវជន និងកីឡា បានថ្លែង ជាលទ្ធល្អបំផុតនៅក្នុងឆ្នាំ ២០១២ សាលា ITC បានផ្ដល់របាយការណ៍ទៅកាន់ក្រសួងអប់រំថា បានសម្រេចដំណើរការយ៉ាងជោគជ័យលើការសិក្សាពីចម្ងាយនេះ ដោយបានបង្កើតឲ្យមានការសិក្សាពីផ្ទះតាមប្រព័ន្ធ អ៊ីនធឺណែត (flipped classroom and blended learning) ចំនួន១៨ ក្រេឌីត និងបានចែកលែកទៅគ្រប់នាយកដ្ឋានសិក្សាផ្សេងៗ និងសាកលវិទ្យាល័យដែលបានសហការថែមទៀត។
ថ្លែងក្នុងវេទិកាពិភាក្សាស្ដីពីការសិក្សាពីចម្ងាយកាលពីថ្ងៃពុធម្សិលមិញដែលមានអ្នកជំនាញព័ត៌មានវិទ្យាជាច្រើននាក់មកពីសាកលវិទ្យាល័យនានាចូលរួម លោក អ៊ុម រម្យណី នាយកវិទ្យាស្ថានបច្ចេកវិទ្យាកម្ពុជាបានថ្លែងឲ្យដឹងថា ការជួបជុំគ្នាពេញមួយថ្ងៃនេះ ដើម្បីនាំយកនូវអ្វីដែលបានបង្កើតថ្មី និងជឿនលឿនក្នុងវិស័យអប់រំ ទៅបញ្ចៀបតាមបណ្ដាសាកលវិទ្យាល័យផ្សេងៗដែលនូវមិនទាន់ទទួលបានព័ត៌មានគ្រប់គ្រាន់។
លោកបន្ដថា៖ «យើងចង់បង្កើតគោលនយោបាយរួមមួយ ដើម្បីឲ្យមានការសម្រេចចិត្ដ ហើយកម្មវត្ថុដែលសំខាន់នោះគឺយើងត្រូវបំពេញកិច្ច ដើម្បីភ្ជាប់បណ្ដាញកម្មវិធីសិក្សាបែបទំនើបនេះរួមគ្នា អាចហៅបានថា បណ្ដាញទំនាក់ទំនងប្រព័ន្ធអ៊ីនធឺណែតសកល»។
លោកបន្ថែមថា ការរួមគ្នាបង្កើត e-Learning នេះបានផ្ដល់ផលចំណេញជាច្រើនដល់សាលា និង និស្សិត ព្រោះអាចបង្កើតបណ្ដាញអ៊ីនធឺណែតកាន់តែទូលំទូលាយនិងបណ្ដុំនៃការសិក្សាពីចង្ងាយ ដោយមិនចំណាយច្រើន។
ប៉ុន្តែយ៉ាងណា លោក អ៊ុម រម្យណី បានឲ្យដឹងថា e-learning នៅមានបញ្ហាប្រឈមច្រើន និង ត្រូវរួមគ្នាដោះស្រាយបញ្ហាដែលកើតមាន។
លោក ឃៀង សុធី អ្នកស្រាវជ្រាវផ្នែកអប់រំ និង e-Learning នៃវិទ្យាស្ថានបណ្ដុះបណ្ដាល និងស្រាវជ្រាវ ដើម្បីការអភិវឌ្ឍន៍កម្ពុជា (CDRI) បានមើលឃើញថា ការសិក្សាតាមបែបទំនើបពីចម្ងាយនេះ អាចជួយឲ្យមានការផ្លាស់ប្ដូរយ៉ាងខ្លាំងនៅក្នុងប្រព័ន្ធអប់រំ។
លោកបន្ដថា «កម្មវិធីសិក្សា e-Learning មានសក្កដានុពលខ្ពស់ ស្របពេលដែលកម្មវិធីសិក្សា យើងនៅមានភាពចាស់កំរឹលនៅឡើយ។ ហើយវានឹងជួយឲ្យការសិក្សារបស់សិស្សមានភាពប្រសើរដោយ ពួកគេចេះវិភាគ និងបង្កើតអ្វីថ្មី ខុសពីគ្រាមុន គ្រាន់តែទន្ទេញឲ្យចាំ និងសិក្សាដូចការបញ្ចុកបាយ ដែលនេះគឺជាកម្រិតទាបមែនទែនក្នុងការទទួលបានចំណេះដឹង»។
លោកបានឲ្យដឹងដែរថា គម្លាតគ្នារវាងអាយុសិស្ស និងគ្រូនាពេលបច្ចុប្បន្នក៏ជាបញ្ហាក្នុងការសិក្សារបស់ពួកគេដែរ ព្រោះយុវជននាពេលបច្ចុប្បន្ន មានភាពជឿនលឿនក្នុងការសិក្សាស្រាវជ្រាវតាមរយៈបច្ចេកវិទ្យាទំនើប ប៉ុន្ដែផ្ទុយទៅវិញគ្រូដែលចាស់ៗមួយចំនួនកម្មវិធីសិក្សារបស់គាត់នៅមិនទាន់មានអ្វីថ្មី។
លោកថា «យុវជនបច្ចុប្បន្ន ពួកគេបានជ្រើសយកការសិក្សាតាមបែបទំនើបតាមរយៈសម្ភារៈ និងបណ្ដាយអ៊ីនធឺណែត។ ដូច្នេះកម្មវិធីសិក្សាចាស់ៗគួរតែមានការកែប្រែតាមពួកគាត់»៕
